Ngā mema o te Poari 

Ka noho haepapa te Poari o Te Papa ki te Minita o Te Manatū Taonga. He mea tohu ngā mema o te Pōari e te Minita, tokowaru ōna mema i tēnei wā.

Evan Williams(Heamana)

Ko Evan Williams te Heamana o mua o te umanga rōia o Chapman Tripp me te Poari o ngā Matapopore o te Auckland City Mission.

I ako, i whakaako hoki a Evan i te ture ki Te Whare Wānanga o Te Ūpoko o te Ika a Māui i mua i tana kuhu hei rōia mō ngā take ture arumoni o Aotearoa, o te ao nui tonu. He mātanga whakatakoto rautaki, whakahaere whakaritenga me te whakatutukitanga o ngā kaupapa nui i te rāngai pūngao, i te rāngai pūngao hiko hoki.

Nō te ngahuru tau kua hipa ake nei, i āna rawa whenua i Aotearoa tōna aronga. I aronui a Evan ki ngā kaupapa tūhonohono ā-iwi, ki te atawhai i ngā rawa whenua, i ngā tikanga whakahaere i ngā whenua tahamoana.

Ko ētahi kaupapa ngahau āna, ko ngā tuhituhinga whānui, ko ngā toi, ko te atawhai i tēnei taonga tuku iho a Papatūānuku, ko te hīkoi me te mahi pāmu.

Evan Williams

Miria Pomare

Kua whai Tohu Paerua i te Mātauranga Tōrangapū a Miria Pomare mai i Te Wānanga o Hawai'i.

Nō Ngāti Toa Rangatira, nō Ngāti Mutunga, arā, nō Te Upoko o te Ika a Miria. He rahi ana wheako e pā ana ki ngā take kāwanatanga ā-rohe, ā, he hua tēnei tūāhuatanga i āna tūnga mō ōna iwi i roto i ngā tau, i tana mahi hei kaikōmihana whakawā. Kua hipa atu i te tekau tau ia e mahi ana i roto i ngā Kerēme, ā, kei te mārama marire a Miria ki ngā tikanga whakahaere i te whakataunga o ngā kerēme Tiriti.

He wahine mārama ki ngā take e pā ana ki ngā tikanga Māori, me kī, mai i te wā i a ia e nohinohi ana, kua piri a Miria ki ōna marae, ki ōna iwi. He kaitiaki a Miria, ā, kua riro mā tōna whānau tētahi kohinga taonga (Māori me te Pākehā) e manaaki. Kua mau i a Miria ngā uara o te āta tiaki i ngā taonga tuku iho. Koia tētahi huarahi e mārama ai te tangata ko wai ia, ā, ki ōna taura here ki te whenua e takoto mai ana.

Miria Pomare

Aloysius Teh

Kei te ārahi a Aloysius Teh i te wāhanga ine mōrearea me te whakatūturutanga rāngai tūmatanui a Deloittes. He kaikaute, he kaitohutohu pakihi, he ringakaha ōna hei taunaki i ngā whakahaere ki te whakapakari i ā rātou tukanga pakihi, i ngā whakatutukitanga me te ārai mōrearea. Kei runga ia i te Poari o te Institute of Internal Auditors New Zealand.

He kaikohi toi hoki a Aloysius, he kairangi o te Venice Biennale me Toi Pōneke. Ka taunaki rāua ko tōna hoa rangatira i ngā whakaaturanga tūmatanui me ngā whakaputanga e whakaatuhia ana e ngā ringatoi o nāianei, o Aotearoa. Ko rāua anō ētahi o ngā kaitaunaki mātāmua o Scots College’s Creative and Performing Arts Centre.

He paetahi a Aloysius nō Te Whare Wānanga o Te Ūpoko o te Ika a Māui. Mai i ngā tau waru tekau e noho mai ana ki Pōneke.

 Aloysius Teh

Philip Carter

He nui te takoha ā-hapori o Phillip Carter ki ngā toi me te kāwanatanga ā-rohe o Ōtautahi. He Kaikaunihera o te Tāone Nui o Ōtautahi i mua, ā, he kaiwhakahaere hoki a Phillip o te Tauranga Rererangi o te Ao i Ōtautahi. Ko ia te Kaitukupūtea Matua o Christchurch Heritage Week i ngā tau 2000–2007. Ko ia anake te kaitukupūtea mō Te Puna o Waiwhetū (Christchurch City Art Gallery), ko ia te Kaitukupūtea o te Taiopenga Toi mō ngā tau e waru. I te tau 2009 ko ia te whakaruruhau nō Te Waipounamu mō te Venice Biennale.

Ko ia te Kaiwhakahaere Matua o te Ohu Kamupene a Carters.

Philip Carter

Wendy Lai

He hoa kaipakihi a Wendy Lai i te kamupene tohutohu pakihi a Deloitte, ā, he mātanga i te rautaki me ngā whakahaere. Nā ēnei pūkenga āna i whai mahi ia hei āwhina i ngā pakihi tūmataiti me ngā tari tūmatanui maha i Aotearoa me Ahitereiria. He pūkenga ia i te whakahaere panoni. I whai tohu ia mai i Te Whare Wānanga o Tāmaki Makaurau, ā, i tohua e te Karauna hei mema o Te Wai Āwhina (Poari Hauora ā-Rohe o Waitematā).

Wendy Lai

Fiona Campbell

Kei Wānaka a Fiona Campbell e noho ana, he ringarehe kōata, he kaihoahoa whakairoiro hoki āna mahi i mua atu rā i tana tū hei kaitautoko ā-pūtea i ngā kaupapa toi. Ko ia tētahi o te hunga nāna i whakaara te kaupapa Real Art Road Trust – he taraka waka toi, e poi haere ana ia tau i te nuku o te whenua, ki ngā kura rau kei tuawhenua.

Ko tētahi aronga o te kaupapa Real Art Charitable Trust, he tautoko i ngā ringatoi me ngā whare toi kei ngā tāone iti, he utu i te tā puka rārangi toi me ngā kaupapa whakatairanga ki rāwāhi, he utu paraihe me te whakanui i te maha o ngā kaimahi.

I te tau 2009, ko Fiona Campbell te papatū o te National Business Review (NBR) Sponsorship of the Arts Awards.

Fiona Campbell

Paul Majurey

He hoa kaipakihi matua a Paul Majurey (Ngāti Maru, Ngāti Whanaunga, Ngāti Pāoa and Ngāti Tamaterā (Marutūāhu)) i te umanga ture o Atkins Holm Majurey i Tāmakimakaurau. Kua hipa atu i te 30 tau i a ia e kawe ana i ngā take Māori, i ngā take pakihi ki te Taraipiunara o Waitangi, ki te kōti taiao hoki, i ngā taumata rau, kua kawe kēhi ki te Kaunihera Motuhake a te Kuini me te Kōti Matua o Aotearoa.

Kua tū a Paul hei kaitohutohu i ngā whakawhitinga kōrero mō ngā kerēme o Te Tiriti o Waitangi, huri noa i te motu. Ko ia te heamana o te Huinga ā-Iwi o Hauraki (12 ngā iwi), o te Huinga ā-Iwi o Tāmaki (13 ngā hapū/iwi) me te Huinga ā-Iwi o Marutūāhu (e 5 ngā iwi). Kua tohua a Paul ki ngā ranga tohutohu i te Minita e toru (mō ngā whakataunga kerēme Tiriti me ngā arotakenga ture taiao),  nāna anō ētahi tuhinga ture taiao, ko ia hoki te Kaikōmihana RMA ā-rohe.

Paul Majurey

Dayle Mace

Kua roa a Dayle Mace e tautoko ana, e whakaruruhau ana i ngā toi ataata me ngā toi whakaari o Aotearoa. He kaitaunaki kaikā a Mace i ngā toi hou o Aotearoa, he mema hoki ia nō Te Ohu Ringa Atawhai i whakatūria hei tirotiro i ngā kaupapa atawhai i ngā toi o Aotearoa

Koinei ngā tūranga matua a Dayle: He matapopore mō te Taiwhanga Toi o Tāmaki, ko ia anō te Heamana o ngā Whakaruruhau o Toi o Tāmaki me te Ohu Whakaari o Tāmaki. Ko ia tētahi o ngā mema o te Poari o te P.A. Edmiston Trust, o te New Zealand Contemporary Art Trust, o te Auckland Art Fair me te Arts Regional Trust Board. Kei runga a Dayle i te Elam Advancement Advisory Board me te Creative Giving Reference Group.

Dayle Mace