Kaheru 

Kaheru

E hāngai ana te ingoa kāheru ki ētahi momo taputapu ahumāra i mōhiotia ai ko te ketu, ko te wauwau, ko te pīnaki. E toru ngā āhua matua o te kāheru; tētahi mea me te mata poto, tētahi mea me te mata roa he rite te āhua ki tō te kō, me te mea he tapatoru te āhua o te mata.

Kīhai i whakamahia te kāheru mō ngā mahi taumaha pērā i te ngawhera oneone, te kaha keri rānei, engari mō ngā mahi māmā atu pērā i te whakakaewa oneone, te ngaki me ērā atu mahi e whai pānga ana. I hangaia i te whānuitanga o ngā momo rākau tae atu ki te maire, te mānuka, te mataī, te akeake, ā, i ētahi wā, i te wheua, te kōhatu rānei.

He ingoa Māori tō te kāhui whetū, a Hyades, ā, ko Mata-kāheru tērā nō te mea he rite te āhua o te kāhui whetū nei ki te mata kāheru.