Te waihanga pūtōrino 

Putorino (bugle flute) 1700-1850, Maker unknown, New Zealand. Oldman Collection. Gift of the New Zealand Government, 1992. Te Papa
Putorino (bugle flute) 1700-1850, Maker unknown, New Zealand. Oldman Collection. Gift of the New Zealand Government, 1992. Te Papa
He tohunga a Warren Warbrick mō te mahi taonga puoro Māori. Whakamahia ai e ia ngā taonga o nehe, arā, te pounamu, te whao, te whao ririki, te niho tōiki, te wheua manu, ngā tūwiri ā-ringa, ā, hei whakarākei i ana taonga ko te matā, te koropungapunga me ngā anga moana.

I roto i ēnei pikitia ka whakaatu a Warren i āna tikanga mahi pūtōrino. E ai ki ngā kōrero i takea mai tōna āhua i te āhua o te pūkoro o te kōwenewene, ā, ko tōna tangi, e ai ki te hinengaro Māori, ko te reo o Hineraukatauri.

You will require Windows Media PlayerReal Player or Quicktime to view these videos.

Aroha mai, kāore he oro mō ēnei whitiāhua.

Ataata 1

Ko te tōtara te rākau ka whakamahia e Warren hei mahi pūtōrino. Ka tangohia e ia te poro rākau, ka tītorehia ki te whao, i muri ka paiheretia e ia ngā wāhanga e rua ki te muka, kia hono ai. Ka whakamahia e ia ana ringaringa kia kitea a waenganui pū o te taonga, kātahi ka tohua e ia, ka kōwiringia he kōwhao i reira ki te niho tōiki.

Low bandwidth (mpg, 894kb) | Medium bandwidth (mpg, 1.91MB), 0:35

Ataata 2

Ka waruwaruhia e Warren a raro o te pūtōrino, ka herea tērā pito, ka hurihia te taonga kia taea ai a runga te waruwaru kia tū ko āhua tika. Whakamahia ai e ia te toki taimaha hei tārei, ko te toki māmā hei whakaoti. Ka whakamahia te matā hei kauorooro i te mata o te rākau. Ko te pai o te kano o te tōtara, he ngāwari te haumitanga o ngā wāhanga o te taonga.

Low bandwidth (mpg, 1.03MB) | Medium Bandwidth (mpg, 2.06 MB), 1:09

Ataata 3

Ka whakamahi a Warren i te koropungapunga hei whakamāeneene i ngā mata o waho. Ka whakamahia he whao pounamu iti hei tīkarokaro a roto i te taonga, me ngā wheua toroa hei whao mō ngā whakairo whakatōririki.

Low bandwidth (mpg, 934kb) | Medium bandwidth (mpg, 1.82MB), 0:37

Ataata 4

Whakamahia ai e Warren te tūwiri hei mahi i te kōwhao mō ngā ngutu. I ngā wā anō e tika ana, ka toutoua te mata o te tūwiri ki te wai hei whakamātao i te kōhatu. Ka whakamahia e Warren te kāra hei kauoro i te kōwhao, me tētahi whao pounamu hei whakaoti i ngā pito e rua. Kātahi ka waruwaruhia anō te taonga puoro ki te matā me te koropungapunga. Ka tūhonotia anō ngā pito e rua ki te pia harakeke, ka honoa anō hoki ki te muka - hei reira kua waiata mai te taonga hou!

Low bandwidth (mpg, 1.92MB) | High bandwidth (mpg, 2.48MB), 1:34