Te Wheke-ngū Nui 

Colossal Squid

Ma te whakaaro nui e hanga te whare;
Ma tematauranga e whakau

 

Curriculum links

Ngā Wāhanga Ako

He maha ngā wāhi hei whakauru i te wheke-ngū ki roto i ngā marau Kura Tuatahi, Kura Tuarua.  Kei te pūtaiao te tino wāhanga ako.

Kuhu ai ki ēhea whenu?

  • ō Mataora (ngā mea ora o te ao)
  • Te āhua o te Pūtaiao

Ngā tino pūkenga

  • Te Whakauru Mai me te āwhina Atu - Ka whakahaua ngā tauira kia mahi tahi me ō rātou hoa, ā, me te honohono haere i a rātou e ako ana mō te whakaaturanga nei.
  • Te whakaaroaro- Ka āhei ngā tauira ki te kimi kōrero ake mō te wheke-ngū mā te whakaputa i ō rātou mōhio me ō rātou mahara, me te patapātai hoki. Ko te mahi whakamātau i te wheke-ngū, he pai mō te wero i te hinengaro.

Ngā Koeke Paetae

1–8

Tau o te rōpū

1–13

He aha ngā kaupapa ako ka tautokona atu e ia?

  • ngā mea ora o te moana
  •  ngā takatūtanga
  • ngā kaupapa mahi mō te taiao
  • ngā mea ora whai tuarā, me ngā mea tuarā kore

Pēhea ake te roa o te wā? 

Tekau miniti, kō paku atu rānei.

Kitea ai te wheke-ngū i hea?

Kitea ai te wheke-ngū i te mutunga o te whakaaturanga Mountains to sea, tata ki te kuhunga ki NatureSpace. Papa 2.

He aha te take me kite aku ākonga i a ia?

  • Koia anake te wheke-ngū nui kei te whakaaturia i te ao
  • Ka kite rātou i te whatu nui rawa kua huraina e te tangata
  •  Ka kite rātou i ngā rārangi matau, rārangi pata o te wheke-ngū hei hopu i tana kaipāhua.
  • Mai i te wā i hopukia, kua puta ki te ao whānui ngā rongo mō te wheke-ngū  – koia tonu te ingoa rongonui kei Te Papa!
  • Ka aronuitia e ngā tauira, ā, i taua wā tonu ka tūtaki rātou ki ētahi whakaaro mō te taiao.
  • He mahi pārekareka mō te whāngai i ō rātou hinengaro

He aha hei mahi i reira?

  • Tirohia ngā whakaaturanga ake mō ngā mea ora o te moana.
  • Toroa te whare tapere ahu-3 kia kite i te moana hōhonu, kāinga o te wheke-ngū nui.
  • Kohia ētahi mōhiotanga mō te wheke-ngū nui rawa o te ao, mā te pānui me te mātaki.

Me mōhio ahau i te aha mō tēnei?

  • Waimarie i mau te wheke-ngū i te kaipuke San Aspiring e hī ana i te Moana ki te Tonga mō te ika nihoriki (toothfish) i Pepuere 2007
  • Nā Te Manatū Ika i koha te wheke-ngū ki Te Papa i te 20 Mei 2007.
  • E toru rā te wheke-ngū e koero ana, ka āhei he rōpū kaipūtaiao nō te ao ki te whakamātau.
  • Nā te webcam i paoho ā rātou mahi ki te 450,000 kaimātaki huri noa i te ao.
  • Ko te wheke-ngū nei te kararehe rahi rawa o te ao, he tuarā kore.
  • He uha te wheke-ngū  a Te Papa.
  • He rahi kē atu ōna whatu i ērā o ngā kararehe katoa e mōhiotia ana – pērā i te pōro poiwhana te rahi. He momo rama kei ia taha o ōna whatu, nā reira he ngāwari mōna te rapu kai i ngā wāhi hōhonu o te moana.  Ko ngā whatu o te nuinga o ngā momo ngū huri kē ki te taha, engari o te wheke-ngū nui, anga whakamua kē, nā tēnei ka taea e ia te tatau i te mamao o tana kaipāhua. Ko te arotahi o ia whatu pērā i te ārani te rahi.    
  • Whiua ai e te wheke-ngū ōna kāwai hei kapo i tana kaipāhua. He āhua pupuhi nei ngā moka o ia kāwai, e āmioa atu ana e te rua rārangi matau takahurihuri. Ka kaha ake te whawhai a te kaipāhua, ka hōhonu ake te kōwiri o ngā matau ki roto i te kiko.
  • Ka mau i ōna kāwai tana kaipāhua, ka kumea mai e te wheke-ngū ki roto i ōna ringa whatoro e waru.  Kei konei te tini matau me te tini pata taratara.  Ka haoa e ngā ringa te kaipāhua, ā, ka nukua mai ki te waha o te wheke-ngū. Ka mau te pupuri i tana kaipāhua, mā tōna ngutu koi ka honia e te wheke-ngū kia itiiti. He pakari tonu te ngutu engari he iti noa iho ka taea e te wheke-ngū te kai. Puta ai tōna korokoro whāiti i waenga i tōna roro, nā reira ki te nui rawa tana ngau, ka mate tana roro.
  • Uhia ana ngā whekau o te wheke-ngū e te pueru kaitā, pēnei i te peke. Ko te pueru nei he rite ki te ngako taumaha, ngako pukupuku. Otirā, he uaua kaitā noa iho kei rō kiri tāpiapia. Kei runga i te kiri ētahi paepae kikī ana i te wai ngārahu.  Ki te tapahia e koe te pueru, ka riro mai ētahi porowhita wheke-ngū e rite ki te wīra taraka te rahi!
  • Kau whakamua ai te wheke-ngū mā te pōkare i tōna pakihau takirua, pakihau pakari. Ka taea anō e ia te haere whakamuri mā te pana i te wai mā tōna kōrere.  Hei whakatopa i te wāhi kotahi, whakawhitiwhiti ai te wheke-ngū i te pōkare pakihau me te pana kōrere. 

Ētahi pātai hei kōrerorero

  • He aha ētahi o ngā tino āhuatanga o te wheke-ngū e taea ai e ia te noho i roto i te moana hōhonu?
  • E tika ana me pupuri te wheke-ngū, me maka kē rānei ki te moana? He aha ngā whakaaetanga me ngā whakakāhoretanga ki te pātai nei?
  • He aha ētahi o ngā kaipāhua me ngā kaipatu o te wheke-ngū?
  • He rite anō ki tētahi kararehe kua kite koe?
  • Ki a koe he pēhea te haere a te wheke-ngū i roto i te wai?
  • Me pēhea tā tātou tiaki i ngā moana me ngā mea ora e noho ana i reira?
  • He aha te tikanga o te kaitiakitanga?
  • Me pēhea e taea e te mātauranga Māori mō te orokohanga te āwhina i a tātou ki te mōhio ki te moana?                                
  • He aha ngā wāhanga o te koiora o te wheke-ngū?
  • Me pēhea ngā kaipūtaiao e mōhio mō te wheke-ngū?
  • Me pēhea tātou e mōhio kei te tika ā rātou rongo kōrero?
  • He tīpuna tō te wheke-ngū nui? Ko wai a ia, me pēhea tātou e mōhio ai?
  • He aha pea ngā pānga atu o te tangata ki te wheke-ngū?

Ētahi atu parongo

Ētahi mea ōrite me ngā wāhi whakaatu